Xəzər dənizi ixtiofaunasının müayinəsi məqsədilə monitorinq aparılıb
Xəzər dənizi ixtiofaunasının müayinəsi məqsədilə Xızı rayonunun Şurabad və Siyəzən rayonunun eyniadlı qəsəbəsinin sahilyanı zonasında monitorinq aparılıb.
Şurabad-Siyəzən akvatoriyası və sahilyanı zonasında aparılan araşdırma nəticəsində 1 tülkü cəsədinə rast gəlinib. Müvafiq müayinələrin aparılması üçün həmin cəsəd Vəhşi Təbiətə Epidemioloji Nəzarət Laboratoriyasına gətirilib. Analizlər bakterioloji və müasir polimer zəncirvari reaksiya (PZR) üsulu ilə həyata keçirilib. Həmin biomaterialların bir qismi Respublika Baytarlıq Laboratoriyasına göndərilib.
Təhlillərin nəticələri quduzluq və digər xəstəliklərin törədicilərinin olmadığını göstərib. Vəhşi Təbiətə Epidemioloji Nəzarət Laboratoriyasında edilmiş analizlər Respublika Baytarlıq Laboratoriyasında aparılmış müayinələrin nəticələri ilə üst-üstə düşüb.
Məlumat AZƏRTAC-a Ekologiya və Təbii Sərvətlər Nazirliyinin Bioloji Müxtəlifliyin Qorunması və Xüsusi Mühafizə Olunan Təbiət Ərazilərinin İnkişaf Departamentindən verilib.
