Azərbaycan 80 min avrodan çox cərimələndi
Aprelin 6-da Avropa İnsan Hüquqları Məhkəməsi Azərbaycandan olan 11 ərizəçinin işi üzrə qərarlar elan edib. Novator.az bildirir ki, vəkil Əsabəli Mustafayev hüquqlarını müdafiə etdiyi 9 ərizəçiyə mənəvi və maddi zərərə görə ümumilikdə 58 min 290 avro kompensasiya kəsildiyini bəyan edib. Şikayətləri təmin olunan şəxslər bunlardır:
Vüsal Bayramov – 8850 avro
Səxavət Mehdiyev – 6480 avro
Azər Sadıqov – 6480 avro
Osman Əhmədov – 6480 avro
Tüncay Quliyev – 6 min avro
Cavid Hacıbəyli – 6 min avro
Tural Sadıqlı – 6 min avro
Kəmalə Xəlilova – 6 min avro
Orxan Əyyubzadə – 6 min avro.
Vəkil əlavə edib ki, həmin işlər üzrə hüquqi xidmətə görə ümumilikdə 9 min 400 avro vəsait tələb olunub.
Avropa İnsan Hüquqları Məhkəməsinin qərarları ilə digər iki iş üzrə Xədicə İsmayıla 6 min, Cavid Qarayevə 4 min avro ödənilməsi tələb edilir. Bu şəxslərin hər birinə hüquqi xidmətə görə əlavə 2 min avro vəsait nəzərdə tutulub.
Məhkəmə qərarları nəticəsində ödəniləcək kompensasiyanın ümumi həcmi isə 81 min 690 avro təşkil edir.
Əsabəli Mustafayev bildirib ki, bu günə qədər Avropa İnsan Hüquqları Məhkəməsinə göndərdiyi 325 şikayətdən 106-sı müsbət həllini tapıb.
