Milli Şuranın mitinq günü dəyişdi
Demokratik Qüvvələrin Milli Şurası Bakı mitinqinin gününü dəyişməyə məcbur olub. Aksiya aprelin 9-u saat 15-ə, Yasamal rayonundakı İdman-Sağlamlıq Kompleksinin stadionuna (“İnşaatçılar” metro stansiyasının yanı) təyin edilmişdi. Amma Bakı Şəhər İcra Hakimiyyəti təşkilatçılara rəsmi cavabında aksiyanı aprelin 8-də keçirməyi məsləhət görüb.
“Turan”ın məlumatına görə, aprelin 4-də mitinqin təşkilatçılarından Oqtay Gülalıyevi, Tofiq Yaqublunu və İlham Hüseyni qəbul edən Bakı Şəhər İcra Hakimiyyətinin başçısı Hacıbala Abutalıbov aksiyanın bazar günündən şənbə gününə keçirilməsini təklif edib, bunu insanların istirahət hüququnun təmin olunmasına hörmət motivləri ilə əsaslandırıb. Demokratik Qüvvələrin Milli Şurası meriyanın təklifini qanunsuz hesab etsə də, aksiyanı aprelin 8-də keçirməyə razılaşıb.
Mitinqin şüarları belədir: “Korrupsiyaya son, monarxiyaya yox!”, “Siyasi məhbuslara azadlıq!”
Novator.az bildirir ki, Milli Şura 2013-cü ildə yaradılıb. Qurumun fəaliyyətinə rəhbərlik edən Koordinasiya Mərkəzində Cəmil Həsənli, Əli Kərimli, Gültəkin Hacıbəyli, Eldəniz Quliyev, Oqtay Gülalıyev, Şahvələd Çobanoğlu, Tofiq Yaqublu, Rövşən Əhmədli, Gözəl Bayramlı, İbrahim İbrahimli və başqa müxaliflər təmsil olunur.
