Korrupsiya qanunvericiliyinə yeniliklər gəlir
Aprelin 5-də Milli Məclisin müdafiə, təhlükəsizlik və korrupsiya ilə mübarizə komitəsinin iclası keçirilib. AZƏRTAC xəbər verir ki, iclasda Azərbaycan Respublikasının Korrupsiyaya Qarşı Mübarizə üzrə Komissiyasının əsasnaməsinə yeni maddə – 7.11-ci maddə əlavə edilib. Yeni maddəyə əsasən, Korrupsiyaya Qarşı Mübarizə üzrə Komissiya cinayət yolu ilə əldə edilmiş pul vəsaitlərinin və digər əmlakın leqallaşdırılmasına və terrorçuluğun maliyyələşdirilməsinə qarşı mübarizə sahəsində qanunvericiliyin icra vəziyyətini müəyyənləşdirəcək.
“Cinayət yolu ilə əldə edilmiş pul vəsaitlərinin və ya digər əmlakın leqallaşdırılmasına və terrorçuluğun maliyyələşdirilməsinə qarşı mübarizə haqqında” qanuna da dəyişiklik edilib. Yeniliyə görə, cinayət yolu ilə əldə edilmiş sərvətin, qeyri-leqal qazanılmış var-dövlətin sahiblərinə xəbərdarlıq edilmədən aktivləri dondurulacaq.
Qanun layihələri Milli Məclisin plenar iclasına tövsiyə edilib.
Novator.az bildirir ki, Korrupsiyaya Qarşı Mübarizə üzrə Komissiya 3 mart 2004-ci ildə yaradılıb, korrupsiyanın qarşısının alınması sahəsində ixtisaslaşmış orqan funksiyalarını həyata keçirir. Komissiyaya Prezident Administrasiyasının rəhbəri Ramiz Mehdiyev sədrlik edir. 15 nəfərlik qurumun 5 üzvünün təyinatı prezidentin, 5 üzvünün təyinatı Milli Məclisin, 5 üzvünün təyinatı Konstitusiya Məhkəməsinin səlahiyyətindədir.
