Sərkisyanın partiyası seçkini uddu
Ermənistanda aprelin 2-də keçirilmiş parlament seçkisinin ilkin nəticələri açıqlanıb. Novator.az-ın məlumatına görə, prezident Serj Sərkisyanın liderlik etdiyi hakim Respublika Partiyası 49,21% səslə önə çıxıb.
Seçicilərin 27,38%-i Sarukyan blokuna dəstək verib. Bu bloka Çiçəklənən Ermənistan Partiyasının sədri, biznesmen Qaqik Sarukyan liderlik edir.
“Yolk” bloku parlamentə 7,72%, Respublika Partiyasının hakimiyyət ortağı olan Daşnaksütun Partiyası 6,59% səslə keçir.
Konqres-Xalq Partiyası, Ohanyan-Raffi-Oskanyan blokları, Erməni Dirçəlişi, Azad Demokratlar və Kommunist partiyaları parlamentə düşə bilmirlər.
Seçki Məcəlləsinə görə, parlamentdə təmsil olunmaq üçün partiyalar 5%, bloklar 7% səs toplamalıdır.
Mərkəzi Seçki Komissiyası seçkiyə 1 milyon 574 min 947 seçicinin qatıldığını bəyan edib. Bu, ümumi seçicilərin 60,86%-i deməkdir.
2015-ci ilin dekabr ayında qəbul edilmiş yeni konstitusiya ilə ölkə mərhələ-mərhələ parlament respublikası idarə üsuluna keçir. Ana qanuna görə, hökuməti proporsional sistemlə seçilən 101 nəfərlik parlamentdə azı 53 mandatı olan partiya quracaq. 2018-ci ildə Serj Sərkisyanın prezident səlahiyyətləri başa çatandan sonra icra hakimiyyəti və dövlət idarəçiliyi sisteminə ümumi rəhbərliyi hökumət həyata keçirəcək. Yalnız dövlət başçısı funksiyası daşıyan prezidenti isə parlament seçəcək.
