Nəzarət-kassa aparatları üzrə komissiyanın yeni tərkibi
“Nəzarət-kassa aparatları üzrə sahələrarası ekspert komissiyasının yaradılması haqqında” Nazirlər Kabinetinin 12 iyun 1995-ci il qərarında dəyişiklik edilib. Novator.az-ın məlumatına görə, ekspert komissiyasının tərkibi yeni redaksiyada təsdiqlənib. Vergilər nazirinin sədrlik etdiyi komissiyada sədr müavinliyi maliyyə nazirinin müavininə həvalə olunub.
Komissiyanın üzvləri bunlardır: Dövlət Statistika Komitəsi Aparatının qiymət statistikası şöbəsinin müdiri; Vergilər Nazirliyinin Vergi Öhdəliklərinin İcrasına Nəzarət Departamentinin baş direktoru; Maliyyə Nazirliyinin uçot siyasəti şöbəsinin müdiri; Standartlaşdırma, Metrologiya və Patent üzrə Dövlət Komitəsinin metrologiya şöbəsinin müdiri; İqtisadiyyat Nazirliyinin strateji planlaşdırma və proqnozlaşdırma şöbəsi müdirinin müavini; Mərkəzi Bankın Nağd Pul Departamentinin direktoru; Azərbaycan Mərkəzi Kooperativlər İttifaqı sədrinin müavini.
