Moldova prezidenti ölkəsini Avrasiya İttifaqına tərəf dartır
Aprelin 3-də Moldova Avrasiya İqtisadi İttifaqı ilə əməkdaşlıq memorandumu imzalayıb. Novator.az-ın məlumatına görə, memoranduma Kişinyovda keçirilən “Avrasiya İqtisadi İttifaqı – Moldova Respublikası” beynəlxalq forumu çərçivəsində prezident İqor Dodon və Avrasiya İqtisadi Komissiyasının sədri Tiqran Sərkisyan qol çəkiblər.
Memorandum Avrasiya İqtisadi İttifaqı ilə Moldova arasında qarışlıqlı əlaqələr qrupunun yaradılmasını nəzərdə tutur. Sənəd Avrasiya İqtisadı İttifaqı ölkələri ilə Moldova arasında qarşılıqlı ticarət və sərmayə əməkdaşlığı həcminin artırılmasına dəstək məqsədi daşıyır.
Sənəddə qeyd olunur ki, memorandum beynəlxalq müqavilə hesab olunmur və tərəflər üçün beynəlxalq öhdəliklər yaratmır. Moldova prezidenti bəyan edib ki, memorandum ratifikasiyaya ehtiyac olmadığı üçün parlamentə göndərilməyəcək.
Parlament respublikası olan Moldova assosiasiya sazişi və azad ticarət müqaviləsi ilə Avropa İttifaqına bağlıdır.
Avrasiya İqtisadi Komissiyası Avrasiya İqtisadi İttifaqının icra orqanıdır. 2014-cü ildə yaradılmış Avrasiya İqtisadi İttifaqına Rusiya, Qazaxıstan, Belarus, Ermənistan və Qırğızıstan daxildir.
Rusiya ilə yaxınlığı ilə tanınan Sosialist Partiyasının lideri İqor Dodon ötən il noyabrın 13-də Moldova prezidenti seçilib.
