Əlillərə xidmət: üç aylıq hesabat verilib
Bu ilin yanvar-mart aylarında Əmək və Əhalinin Sosial Müdafiəsi Nazirliyinin Protez-Ortopedik Bərpa Mərkəzi, onun Gəncə filialı və Naxçıvan istehsalat sahəsi əlilliyi olan 2801 nəfər şəxsə protez-ortopedik bərpa xidmətləri göstərib. Həmin şəxslərdən 428 nəfəri Qarabağ müharibəsi əlilləridir.
Rəsmi hesabata görə, əlilliyi olan şəxslərə üç ayda 254 ədəd aşağı və yuxarı ətraf protezi, 386 ədəd aşağı və yuxarı ətraf ortezi, bel və boyun nahiyəsi üçün 126 ədəd korset, 2311 ədəd müxtəlif reabilitasiya vasitəsi, 275 ədəd dirsəkaltı ağac, 78 ədəd dördayaqlı dayaq vasitəsi verilib.
Bu təbəqədən olan insanlar 574 cüt protez ayaqqabı və 1067 cüt ortopedik ayaqqabı, 166 cüt qoltuqaltı ağac, 563 ədəd əsa, 49 ortopedik aparat və s. ilə təmin olunublar.
Əlilliyi olan şəxslərin əlil arabaları, eşitmə aparatları ilə təminatı istiqamətində də müvafiq işlər görülüb. Eləcə də onlara məxsus 182 ədəd reabilitasiya vasitəsi və protez-ortopedik məmulat təmir edilib.
Ümumilikdə 2017-ci ilin yanvar-mart aylarında Əmək və Əhalinin Sosial Müdafiəsi Nazirliyi əlilliyi olan şəxsləri 6878 reabilitasiya vasitəsi və protez-ortopedik məmulatla təmin edib.
