40 ildən çoxdur gözdən itmiş kometa yenidən peyda olub
40 ildən çoxdur gözdən itmiş kometa yenidən Yerə yaxın məsafədə görünüb. Novator.az xəbər verir ki, bu kometanı ulduzlar sistemində, Əjdaha və Böyük ayı bürcləri arasında müşahidə etmək mümkün olub.
Alimlər sözügedən kometanı 41Q/Tuttlaya-Cakobini-Kresaka adlandırırlar. O ən qədim kometalardan sayılır.
NASA-nın açıqlamasına görə, bu kometa aprelin 1-dən başlayaraq Yerə ən yaxın məsafədə hərəkət edir.
Tədqiqatçılar 41Q/Tuttlaya-Cakobini-Kresakanı nə vaxt aydın müşahidə edə biləcəklərini söyləməsələr də, onun nəzarətdə olduğunu qeyd edirlər.
Bu kometa günəş sistemində, Yer planetinə yaxın məsafədə 1858-ci ildə də müşahidə edilib. 1907-ci ildə o, Yerə doğru hərəkətlənib, az sonra gözdən itib, bir də 1928-ci ildə üzə çıxıb. Kometa 1934-1951-ci illərdə də fəal olub. O, sonuncu dəfə 1973-cü ildə müşahidə edilib və o vaxt elə parlaq, böyük olub ki, adi gözlə də görünürmüş.
1973-cü ildən sonra “itən” 41Q/Tuttlaya-Cakobini-Kresaka 2017-ci ildə yenidən peyda olub və hazırda Yerdən 19,5 milyon kilometr aralıda hərəkət edir.
Alimlərin ehtimalına görə, kometa aprelin 12-də Günəşə xeyli yaxınlaşacaq.
NASA-nın məlumatına görə, bu il yanvarın əvvəlində NEOWİSE missiyasının astronomları Yerə yaxınlaşan daha iki kometanı müşahidə ediblər.
