Milli şans

31 Mart 2017
comments
Redaktor
Posted in Şərh

Avropa zonasında dünya futbol çempionatının seçmə mərhələsi iyun ayından davam edəcək. C qrupunda yarışan Azərbaycan milli komandası 5 turdan sonra 7 xalla dördüncü yerdədir.

2018-ci ildə Rusiyada keçiriləcək final mərhələsinə qrup qalibi birbaşa vəsiqə alır, ikinci yeri tutan komanda isə bunun üçün əlavə oyunlar şansı qazanır. Azərbaycan milli komandasının ikinci yeri tutmaq şansı nə qədərdir?

Novator.az-ın sualını cavablandıran idman icmalçısı Rasim Mövsümzadə deyib ki, millinin pley-offa çıxmaq uğrunda mübarizəni davam etdirməsi Şimali İrlandiya ilə Bakıdakı oyunun nəticəsindən asılı olacaq: “Məğlubiyyət və heç-heçədən danışmayaq. Çünki bu halda Azərbaycan komandasının imkanları heçə enəcək. Qələbə sayəsində isə Şimali İrlandiya ilə xalımız eyniləşəcək. Amma bu vəziyyət də bizi qane etmir. O zaman son 4 turda irlandlardan daha çox xal toplamalıyıq. Çünki yekunda xallar eyni olsa, ilk növbədə top fərqinə, sonra da vurulan qolların sayına baxılacaq. Bundan sonra komandaların öz aralarındakı oyunların nəticələri nəzərə alınacaq. Hazırda bu göstəricilərin hamısında Şimali İrlandiyadan geri qalırıq.

Maraqlıdır ki, aşkar lider və autsayderlə oyunları saymasaq, təqvimə əsasən, hər iki komandanın – həm bizim, həm də irlandların səfərdə Norveç, evdə Çexiya ilə matçı qalıb.

Çexiyadan söz düşmüşkən, bu komandanı da hesabdan silmək olmaz. Çünki artıq çexlər bizim komandanı 1 xal qabaqlayırlar.

Üstəlik, 2-ci yer də komandalara dərhal pley-offa vəsiqə vermir. Bunun üçün göstəricilərə görə qrup 2-ciləri arasında səkkizliyə düşmək şərtdir. Bizim qrupda bu göstəricilərdə autsayder San Marino ilə oyunların nəticələri qeydə alınmayacaq. Bu da komandamızın əleyhinə olan məqamdır”.