Millətlər Liqası necə keçiriləcək?
UEFA Millətlər Liqası divizionlarının ilkin tərkibini açıqlayıb. 2018-ci ilin sentyabrından başlayacaq turnirdə 55 milli komanda A, B, C və D divizionlarına bölünəcək. Bölgü 2018-ci ilin dünya çempionatının seçmə mərhələsinin sonuna olan reytinq əsasında aparılacaq.
UEFA üzvlərinin son reytinq cədvəli martın 26-da məlum olub. Məhz bu reytinq əsasında qrupların ilkin heyəti açıqlanıb.
A divizionu: Almaniya, Fransa, Portuqaliya, Belçika, İspaniya, İngiltərə, İsveçrə, İtaliya, Xorvatiya, Polşa, İslandiya, Bosniya və Herseqovina;
B divizionu: İrlandiya, Rusiya, Avstriya, İsveç, Slovakiya, Uels, Ukrayna, Hollandiya, Şimali İrlandiya, Çexiya, Türkiyə, Macarıstan;
C divizionu: Yunanıstan, Rumıniya, Sloveniya, İsrail, Serbiya, Danimarka, Bolqarıstan, Albaniya, Şotlandiya, Monteneqro, Norveç, Litva, Azərbaycan, Kipr, Ermənistan;
D divizionu: Estoniya, Finlandiya, Belarus, Gürcüstan, Farer adaları, Latviya, Makedoniya, Qazaxıstan, Moldova, Lüksemburq, Lixtenşteyn, Kosovo, Malta, Andorra, San Marino, Cəbəllütariq.
Reqlamentə əsasən, komandalar bir diviziondan digərinə yüksələ və düşə bilər.
Novator.az bildirir ki, hər divizion üzrə dörd qrup yaradılacaq və iki dövrədən ibarət turnir keçiriləcək. Ukrayna yığması ilə Rusiya, Azərbaycan millisi ilə isə Ermənistan komandası eyni qrupda yer ala bilməzlər.
Millətlər Liqasının qalibi 2019-cu ilin iyununda A divizionundan dörd komandanın iştirak edəcəyi final turnirində müəyyənləşəcək.
Turnir 2020-ci ilin Avropa futbol çempionatının final mərhələsinə hər diviziondan 1 komanda olmaqla 4 vəsiqə verir. Bunun üçün divizionlardakı qrup qalibləri arasında əlavə oyunlar təşkil olunacaq.
