Direktor vəzifəsinə qəbul qaydaları
Ümumi təhsil müəssisələrində direktor vəzifəsinə qəbulun yeni qaydaları təsdiq edilib. Təhsil Nazirliyi bildirir ki, qaydalara əsasən, direktor vəzifəsinə işə qəbul üzrə müsabiqə mərkəzləşdirilmiş qaydada 3 mərhələdə (elektron ərizənin qəbulu, imtahan, müsahibə) həyata keçiriləcək.
Aprel-avqust ayları ərzində keçirilməsi nəzərdə tutulan müsabiqədə pedaqoji və ya idarəetmə sahəsi üzrə ali təhsilli, azı 5 il pedaqoji stajı olan və hazırda ümumi təhsil müəssisələrində pedaqoji sahədə çalışan şəxslər iştirak edə bilər.
Elektron ərizələrin qəbulu aprelin 1-dən 15-nə qədər keçiriləcək. Bu mərhələdə namizədlər hazırda işlədiyi müəssisənin yerləşdiyi və ya yaşadığı rayon (şəhər) üzrə 4 vakant məktəb seçə bilər.
İmtahan mərhələsində namizədlər əmək və təhsil qanunvericiliyi, məktəb idarəçiliyi sahəsində test tapşırıqlarını cavablandıracaq, təqdim olunan konkret mövzu üzrə elektron qaydada esse yazacaqlar.
Qeydiyyatdan keçmək istəyən şəxslər www.miq.edu.az/direktorlar səhifəsinə daxil olmalıdır.
