Naxçıvanda əməkhaqqı 3,4 faiz artıb
Naxçıvan Muxtar Respublikasında bu ilin yanvar-fevral aylarında 332,6 milyon manatlıq ümumi daxili məhsul istehsal olunub. Bu, ötən ilin müvafiq dövrü ilə müqayisədə 0,9 faiz çoxdur. Hər nəfərə düşən ümumi daxili məhsulun həcmi 2016-cı ilin müvafiq dövrü ilə müqayisədə 3,9 faiz artaraq 740 manata çatıb.
Naxçıvan Muxtar Respublikası Dövlət Statistika Komitəsinin mətbuat xidmətindən AZƏRTAC-a bildirilib ki, ümumi daxili məhsulun tərkibində ilk yeri sənaye sahəsi tutur. Sənaye üzrə 164,5 milyon manat həcmində məhsul istehsal edilib, bu da 2016-cı ilin müvafiq dövründəki göstəricini 0,9 faiz üstələyib.
Yanvar-fevral aylarında 13,9 milyon manat həcmində kənd təsərrüfatı məhsulu istehsal olunub. Bu, 2016-cı ilin müvafiq dövründəki göstəricini 3,6 faiz ötür.
Rəsmi hesabata görə, 2017-ci ilin yanvar-fevral aylarında muxtar respublikada əhalinin gəlirləri 2016-cı ilin müvafiq dövrü ilə müqayisədə 1,2 faiz artaraq 242,3 milyon manat, onun hər bir nəfərə düşən həcmi isə 0,2 faiz yüksələrək 539,1 manat olub.
Cari ilin yanvar ayında muxtar respublika iqtisadiyyatında bir işçiyə hesablanmış orta aylıq əməkhaqqı 413,4 manat təşkil edib və bu göstərici 2016-cı ilin müvafiq dövrü ilə müqayisədə 3,4 faiz artıb.
