Ekologiya və təbii sərvətlər naziri Ağdamda vətəndaşları qəbul edib
Martın 30-da ekologiya və təbii sərvətlər naziri Hüseyn Bağırov Ağdam rayonunun Quzanlı qəsəbəsində Ağdam, Ağcabədi, Tərtər və Bərdə rayonlarının vətəndaşları ilə görüşüb.
Ekologiya və Təbii Sərvətlər Nazirliyindən Novator.az-a verilən məlumata görə, qəbulda nazirliyin idarə və departamentlərinin, həmçinin tabeli qurumlarının rəhbərləri də iştirak ediblər.
Qəbul zamanı ətraf mühitin və ekoloji tarazlığın mühafizəsi, meşələrin qorunması, biomüxtəliflik, hidrometeorologiya və başqa məsələlərlə bağlı 40-a yaxın vətəndaşın müraciətinə baxılıb. Hüseyn Bağırov müraciətlərin, şikayət və təkliflərin öyrənilməsi və tədbirlərin görülməsi üçün nazirliyin müvafiq strukturlarının rəhbərlərinə tapşırıqlar verib.
Nazirliyin məlumatına görə, vətəndaşları narahat edən məsələlərin bir qismi yerindəcə həllini tapıb, qaldırılan digər məsələlər isə operativ şəkildə araşdırılması üçün nəzarətə götürülüb. Ekologiya və Təbii Sərvətlər Nazirliyinin fəaliyyət dairəsinə aid olmayan müraciətlər müvafiq qurumlara çatdırılmaq üçün qeydiyyata alınıb.
