ƏDV-ni qaytaran köşklərin qurulacağı ilkin siyahı açıqlanıb
Vergilər Nazirliyində Maliyyə Bazarlarına Nəzarət Palatasının, Mədəniyyət və Turizm Nazirliyinin, bankların nümayəndələri ilə ticarət festivallarının təşkilinə həsr olunmuş görüş keçirilib. Media və Kommunikasiya Mərkəzindən Novator.az-a verilən məlumata görə, martın 29-da keçirilən görüşdə vergilər nazirinin müavini Sahib Ələkbərov Bakı ticarət festivallarının təşkili məsələlərindən danışıb. O bildirib ki, ildə iki dəfə təşkil olunması planlaşdırılan ticarət festivallarının məqsədi ölkənin turizm baxımından cəlbediciliyinin yüksəldilməsi, sahibkarlıq fəaliyyətinin təşviq edilməsi ilə ticarət dövriyyəsinin artırılmasının stimullaşdırılmasıdır.
Ticarət festivalları dövründə fiziki şəxslərin Azərbaycan ərazisində aldığı, istehsal, yaxud kommersiya məqsədləri üçün nəzərdə tutulmayan mallara görə ödənilmiş əlavə dəyər vergisinin qaytarılması qaydasına uyğun olaraq iri ticarət obyektlərində aparılan işlərin başa çatmaq üzrə olduğunu qeyd edən nazir müavini deyib ki, ticarət festivalları dövründə alınan mallar üzrə ödənilmiş ƏDV-nin qaytarılması məqsədilə ilkin mərhələdə “Park Bulvar”, “Port Baku Mall”, “Nərgiz Mall”, “Metropark”, “28 Mall”, “Gənclik Mall” ticarət mərkəzlərində xüsusi köşklərin qurulması planlaşdırılır.
Festivalın yüksək səviyyədə və səmərəli təşkili üçün xidmət göstərəcək işçi heyətinin bayram və istirahət günlərində də işləməsi təmin olunacaq. Alıcıların rahatlığının təmin edilməsi üçün ticarət festivallarına cəlb olunacaq bankların filialları ƏDV qaytarılması sisteminə qoşulacaq.
Aprelin 10-dan mayın 10-dək Azərbaycan paytaxtında ilk dəfə ticarət festivalı – “Baku Shopping Festival” keçiriləcək. Prezident İlham Əliyevin 1 sentyabr 2016-cı ildə imzaladığı “Azərbaycan Respublikasında turizmin inkişafı ilə bağlı əlavə tədbirlər haqqında” sərəncamı ilə festivalın təşkili Mədəniyyət və Turizm Nazirliyinin nəzdində fəaliyyət göstərən Azərbaycan Konqreslər Bürosuna həvalə olunub.
