Britaniyanın parçalanması prosesi başladı
Böyük Britaniyanın muxtar bölgəsi Şotlandiyanın parlamenti müstəqillik referendumu keçirilməsinə səs verib. Novator.az-ın məlumatına görə, martın 28-də keçirilən səsvermədə təşəbbüsü 69 deputat dəstəkləyib, 59 nəfər bunun əleyhinə çıxıb.
Referendum təşəbbüsünü Şotlandiyanın birinci naziri, hakim Şotland Milli Partiyasının lideri Nikola Stercen irəli sürüb. Parlamentin qərarı ona rəsmi Londonla referendum təyinatı ilə bağlı danışıqlar aparmaq səlahiyyəti verir. Böyük Britaniyanın razılığı olmadan referendum təyin edilə bilməz.
Şotlandiya hakimiyyəti referendumu ya 2018-ci ilin payızına, ya da 2019-cu ilin yazına təyin etmək istəyir.
2016-cı il iyunun 23-ü Böyük Britaniyada keçirilmiş referendumda ölkənin Avropa İttifaqından ayrılmasına səs verilib. Ayrılıq prosesi 2019-cu ilədək çəkə bilər. Şotlandiya Avropa İttifaqından ayrılmaq istəmir.
1707-ci ildən İngiltərə ilə ittifaqda olan Şotlandiya 1997-ci ildə muxtariyyət əldə edib.
2014-cü il sentyabrın 18-də Şotlandiyada ilk müstəqillik referendumu olub, seçicilərin 55,4%-i Böyük Britaniyanın tərkibində qalmağa tərəfdar çıxıb.
