Banklarla bağlı yeni layihələr müzakirə olunub
Martın 29-da Milli Məclisin hüquq siyasəti və dövlət quruculuğu komitəsinin iclası keçirilib. AZƏRTAC xəbər verir ki, iclasda İnzibati Prosessual, Mülki Prosessual və Mülki məcəllələrə əlavələr və dəyişikliklər haqqında qanun layihələri müzakirə olunub.
Qanun layihələri barədə Maliyyə Bazarlarına Nəzarət Palatasının Direktorlar Şurasının sədri Rüfət Aslanlı məlumat verib. O bildirib ki, dəyişikliklərin məğzi ödəmə qabiliyyətini itirmiş və yaxud itirmək astanasında olan bankların problemlərinin həllini təmin edəcək yeni hüquqi, administrativ çərçivəni müəyyən etməkdir: “Bu təkliflər “Banklar haqqında” qanunda ediləcək dəyişikliklərin prosessual nöqteyi-nəzərdən dəstəklənməsinə xidmət edəcək. Məsələnin mahiyyəti bankların ictimai fondları idarə edən təsisatlar olmasıdır. İnsanlar, bizneslər, həm də kvazidövlət təşkilatları öz vəsaitlərini banklarda saxlayırlar. Banklar həmin vəsaitləri öz adlarından cəlb edib yerləşdirdiyinə görə bu vəsaitlərin mütəmadi olaraq müəyyən riskləri var. Bu riskləri idarə etmək üçün banklar kapital vəsaitlərə malik olmalıdırlar. Hər zaman bu tələblər qorunmur. Qorunmamağın səbəbləri kənar və daxili amillərlə bağlı ola bilər. Bunun qarşısını almaq üçün bankların fəaliyyətinə hərtərəfli nəzarət edilir. Bank fəaliyyətinə xüsusi icazələr, lisenziyalar verilir. Bank fəaliyyətinin hər sahəsi nəzarət orqanları tərəfindən tənzimlənir”.
İnzibati Prosessual Məcəlləyə yeni maddə əlavə edilib. Yeni maddədə qeyd olunur ki, maliyyə bazarlarına nəzarət orqanında banka müvəqqəti inzibatçı təyin edilməsi, bankın lisenziyasının ləğvi və bankın rezolyusiyası çərçivəsində qəbul olunmuş digər qərarlar məhkəmədə ləğv edilə bilməz.
Miqrasiya Məcəlləsinə 19-1-ci maddə əlavə olunub. Əlavəyə əsasən, Azərbaycan Respublikasına viza tələb olunmayan qaydada gələn əcnəbilər və ya vətəndaşlığı olmayan şəxslər (məcəllənin 19-1.2-ci maddəsində göstərilən şəxslər istisna olmaqla) miqrasiya kartını doldurmalı və Azərbaycanın dövlət sərhədinin buraxılış məntəqəsindən keçərkən pasport və ya digər sərhədkeçmə sənədi ilə birgə təqdim etməlidirlər.
