Avropa Yayım Birliyi rus ifaçıya görə Ukraynanı hədələdi
Avropa Yayım Birliyinin başçısı İnqrid Deltenre Rusiyanı “Avroviziya 2017” yarışmasında təmsil etməli olan Yuliya Samoylova ətrafında yaranmış qalmaqala münasibət bildirib.
Mayın 9-dan 13-dək Ukrayna paytaxtı Kiyevdə keçiriləcək “Avroviziya 2017” mahnı müsabiqəsinə 43 ölkə qatılır. Mahnı müsabiqəsində Rusiyanı əlil ifaçı Yuliya Samoylova təmsil etməlidir. Yuliya Samoylova 1989-cu ildə Komi Respublikasının Uxta şəhərində doğulub. 13 yaşından onurğa beyni hüceyrələrinin inkişaf etməməsi xəstəliyindən əziyyət çəkir, əlil arabasında gəzir.
Ukrayna hökuməti onun ölkə ərazisinə girişinə 3 illik qadağa qoyub. Bu, Yuliya Samoylovanın 2014-cü ildə Rusiyanın işğal etdiyi Ukrayna torpağı Krıma qanunsuz səfəri ilə bağlıdır.
Novator.az-ın məlumatına görə, martın 29-da İsveçrə mediasına danışan İnqrid Deltenre deyib ki, Ukraynanın Yuliya Samoylovanı ölkəyə buraxmaqdan imtina etməsi mahnı müsabiqəsinin imicinə zərbə vurur: ”Ukraynanın davranışı qəti qəbuledilməzdir”.
Avropa Yayım Birliyinin rəhbəri qeyd edib ki, hazırda Ukrayna prezidenti və baş naziri ilə bu məsələ ətrafında danışıqlar aparır: “Biz Yuliya Samoylovanın Ukraynaya buraxılmaması qərarının ləğvinə və ya qərarın “Avroviziya 2017”dən sonra qüvvəyə minməsinə çağırırıq”.
İnqrid Deltenre əlavə edib ki, gələn həftənin sonuna qədər Rusiyanın yarışmada iştirakı ilə bağlı məsələ öz həllini tapmasa, Ukrayna “Avroviziya 2017”dən kənarlaşdırıla bilər.
Avropa Yayım Birliyi “Avroviziya” musiqi yarışını 1956-cı ildən keçirir.
