Vergi ödəyicilərinə xəbərdarlıq edilib
Vergilər Nazirliyi vergi ödəyicilərinə xəbərdarlıq edib. 2016-cı hesabat ilinin yekunları ilə bağlı xəbərdarlıqda qeyd olunur ki, gəlir vergisinin ödəyiciləri olan rezident və qeyri-rezident fiziki şəxslər gəlir vergisinin bəyannaməsini; mənfəət vergisinin ödəyiciləri olan rezident və qeyri-rezident hüquqi şəxslər mənfəət vergisinin bəyannaməsini; əmlak vergisinin ödəyicisi olan müəssisələr əmlak vergisinin bəyannaməsini martın 31-dən gec olmayaraq vergi orqanına təqdim etməyə, hesablanmış vergiləri həmin müddətədək tam həcmdə dövlət büdcəsinə ödəməyə borcludurlar.
Novator.az bildirir ki, xəbərdarlığa əsasən, vergi hesabatını və vergi öhdəliyinin yaranmaması barədə arayışı müəyyən edilən müddətdə təqdim etməyən vergi ödəyicisinə vergi orqanının qərarına əsasən 40 manat məbləğində; büdcəyə çatası vergi məbləğini hesabatı təqdim etməməklə yayındırdıqda vergi ödəyicisinə yayındırılmış vergi məbləğinin (kameral vergi yoxlaması nəticəsində hesablanmış əlavə vergi məbləği istisna olmaqla) 50 faizi miqdarında maliyyə sanksiyası tətbiq edilir.
Nazirlik qeyd edir ki, vergi qanunla müəyyən edilmiş müddətdə ödənilmədikdə ödəmə müddətindən sonrakı hər bir ötmüş gün üçün (ancaq bir ildən çox olmamaqla) vergi ödəyicisindən ödənilməmiş vergi məbləğinin 0,1 faizi miqdarında faiz tutulur.
