Monitorinq: çayların sululuğunda mühüm dəyişiklik yoxdur
Ekologiya və Təbii Sərvətlər Nazirliyinin Milli Hidrometeorologiya Departamentinin verdiyi məlumata görə, ötən günlər ərzində çayların sululuğunda əsasən mühüm dəyişiklik müşahidə olunmayıb. Hazırda Böyük Qafqazın Quba-Xaçmaz bölgəsi çaylarında sululuq ongünlük normanın 100-160, Kiçik Qafqazın çaylarında 100-230, Lənkəran-Astara bölgəsi çaylarında isə 30-60 faizini təşkil edir.
Departament tranzit çaylarda hazırkı vəziyyətlə bağlı bildirir ki, martın 27-də Kür çayının Qıraqkəsəmən məntəqəsində suyun səviyyəsində dəyişiklik müşahidə olunmayıb. Hazırda məntəqədə su sərfi ongünlük normanın 57 faizini təşkil edir.
Qanıx çayının Əyriçay məntəqəsində suyun səviyyəsində 2 santimetr azalma müşahidə olunub. Hazırda məntəqədə su sərfi ongünlük normanın 50 faizini təşkil edir.
Martın 27-də Kür çayının aşağı axınında suyun səviyyəsində azalma olub. Belə ki, Kür çayının Surra məntəqəsində 1, Şirvanda 26, Salyanda 17, Bankədə 6, Araz çayının Novruzlu məntəqəsində 5 santimetr azalma qeydə alınıb.
Hazırda Surra məntəqəsində suyun səviyyəsi 374, Şirvanda 253, Salyanda 200, Bankədə 175, Araz çayının Novruzlu məntəqəsində isə 73 santimetrdir.
