Kasıbçılıq əqli inkişafdan qoyur
Ana bətnində inkişaf dövründə və körpə yaşlarında B12 vitamini çatışmazlığı uşaqları əqli inkişafdan qoyur. Novator.az-ın məlumatına görə, Norveç alimlərinin tədqiqatı bunu göstərib.
Alimlər Nepalda yaşayan 500 körpənin qan nümunələrini analiz edərək B12 vitamininin miqdarını müəyyənləşdiriblər. Beş ildən sonra alimlər həmin uşaqların 320-si ilə görüşərək müxtəlif testlərin köməyi ilə onların əqli qabiliyyətini yoxlayıblar. Məlum olub ki, B12 vitamini çatışmayan uşaqlar hərfləri tanınmaqda, həmyaşıdlarının emosiyalarını izah etməkdə və tapmaca tapmaqda çətinlik çəkiblər. Tədqiqata cəlb olunan uşaqların əksəriyyətində B12 vitaminin boy artımı və inkişaf üçün gərəkli miqdarı aşağı olub.
Əsasən ət, yumurta və süd məhsullarının tərkibində olan B12 vitamininin çatışmazlığı yoxsul ölkələrdə daha çox yayılıb. Kasıb əhali ət, yumurta və süd məhsulları ilə tam qidalana bilmir. İnkişaf etmiş ölkələrdə isə B12 vitamini çatışmazlığı qrupuna daha çox vegetarianlar daxildir.
