Sabiq baş nazirin partiyası seçkini uddu
Bolqarıstanda martın 26-da keçirilmiş növbədənkənar parlament seçkisinin ilkin nəticələri açıqlanıb. Novator.az-ın məlumatına görə, Avropa İttifaqı tərəfdarlarını birləşdirən GERB Partiyası 32,7% səslə qalib olub.
Təmsilçisi prezident kürsüsündə oturan Sosialist Partiyası 26,8% səs toplayaraq məğlubiyyətini etiraf edib.
Daha üç koalisiya 4%-lik seçki baryerini keçib. “Birləşmiş vətənpərvərlər” bloku 9,1%, müsəlmanları birləşdirən Hüquq və Azadlıq Hərəkatı 8,4%, populist “İradə” bloku 4,1% səs yığıb.
240 yerlik parlamentə düşmək uğrunda 13 partiya, 9 koalisiya, ümumilikdə 4 min 732 namizəd mübarizə aparıb.
Ötən noyabrın 13-də Sosialist Partiyasından Rumen Radev Bolqarıstan prezidenti seçilib. Rusiya ilə yaxınlaşmaq tərəfdarı olan qüvvələrin qələbəsindən sonra GERB Partiyasının təmsilçisi olan baş nazir Boyko Borisov istefa verib və ölkə növbədənkənar seçkiyə gedib.
