Sərkisyanın hədəsinə cavab verildi
Azərbaycanın Müdafiə Nazirliyi Ermənistan prezidenti Serj Sərkisyanın bəyanatını cavablandırıb.
Novator.az xatırladır ki, ötən həftə Dağlıq Qarabağa gələn Sərkisyan hərbçilərlə görüşündə Azərbaycanı hədələyib. O deyib ki, ötən ilin aprelindən bəri erməni birləşmələri cəbhə xəttini xeyli gücləndirib: “İndi bizim qüvvələr rəqibi onun ərazisinin dərinliklərində belə izləyir. Rəqibin bütün vacib infrastrukturlarına yönələn güclü silahlar var. Ermənistan Silahlı Qüvvələrinin ali baş komandanı isə lazımi anda gözünü də qırpmadan “İskəndər” raketindən atəş açmaq əmri verməyə hazırdır”.
Martın 27-də Azərbaycanın Müdafiə Nazirliyi bəyan edib ki, Sərkisyanın bəyanatı onun cinayətkar dəstəsinin itirilmiş nüfuzunu bərpa etmək və seçkiqabağı xal toplamaqla reytinqini yüksəltmək məqsədilə daxili auditoriyaya hesablanmış primitiv addımdır: “Düşmən anlamalıdır ki, Azərbaycanın işğal edilmiş əraziləri, o cümlədən Ermənistanda yerləşən bütün hərbi təyinatlı və digər strateji əhəmiyyətli obyektlər ordumuzun son illər ərzində əldə etdiyi ən müasir raket və artilleriya qurğularının daim hədəfindədir.
Ermənistan tərəfdən yarana biləcək istənilən təhdid və hədələrin qarşısı dərhal və qətiyyətlə alınacaq. Görüləcək cəza tədbirləri nəticəsində Ermənistanın məruz qalacağı irimiqyaslı itkilər və dağıntılar qaçılmaz olacaq, onun üçün faciəvi və bərpası mümkün olmayan fəsadlara gətirib çıxaracaq. Odur ki, Ermənistanın rəhbərliyi belə məsuliyyətsiz bəyanatlar verməzdən əvvəl əhalisinin aqibətini düşünməlidir”.
1988-ci ildən başlayaraq Ermənistanın Azərbaycana hərbi təcavüzü nəticəsində Dağlıq Qarabağ bölgəsi və onun həndəvərindəki 7 rayon zəbt olunub.
2016-cı il aprelin 2-dən 5-dək Azərbaycanın Silahlı Qüvvələri əks-həmlə əməliyyatları zamanı Ağdərə, Füzuli və Cəbrayıl rayonları ərazilərində bəzi məntəqələri işğaldan azad edib.
