Sərkisyan hakimiyyətdə qalmaq mesajı verir
Ötən həftə Azərbaycanın işğal altında olan Dağlıq Qarabağ bölgəsinə gələn Ermənistan prezidenti Serj Sərkisyan separatçı hərbi birləşmələrdən birində çıxış edərkən özünün gələcək fəaliyyəti ilə bağlı məsələyə də toxunub.
Novator.az-ın məlumatına görə, Sərkisyan deyib: “Məndən həmişə soruşurlar ki, 2018-ci ildən sonra nə ilə məşğul olacaqsan? Əslində mən ömrüm boyu heç vaxt növbəti mərhələ ilə bağlı plan qurmamışam. Hər zaman bizim təhlükəsizliyimiz üçün harada xeyir verə bilərəmsə, orada olmuşam. Mən bilmirəm 2018-ci ildə siyasi struktur necə olacaq. Amma başçılıq etdiyim partiya qarşıdan gələn parlament seçkisindən qalib çıxsa, hər hansı bir statusda xalqın təhlükəsizliyi işində rol ala bilərəm. Mən bilmirəm bu nə status olacaq. Amma hər hansı bir statusda gərəkli ola biləcəyim dəqiqdir”.
Aprelin 2-də Ermənistanda parlament seçkisi keçiriləcək. 2015-ci ildə qəbul edilmiş yeni konstitusiya ilə ölkə mərhələ-mərhələ parlament respublikası idarə üsuluna keçir. Ana qanuna görə, hökuməti proporsional sistemlə seçilən 101 nəfərlik parlamentdə azı 53 mandatı olan partiya quracaq. 2018-ci ildə Serj Sərkisyanın prezident səlahiyyətləri başa çatandan sonra icra hakimiyyəti və dövlət idarəçiliyi sisteminə ümumi rəhbərliyi hökumət həyata keçirəcək. Yalnız dövlət başçısı funksiyası daşıyan prezidenti isə parlament seçəcək.
2008-ci ildən prezident postunu tutan Serj Sərkisyan 25 dəfə Dağlıq Qarabağa qanunsuz səfər edib. O, işğalçı müharibənin qaniçən liderlərindən biridir. 1989-cu ildən Dağlıq Qarabağ separatçılarının komandanı, 1993-cü ildən isə Ermənistanın müdafiə naziri olub, sonrakı illərdə müxtəlif rəhbər vəzifələrdə çalışıb, o cümlədən baş nazir kürsüsünü tutub.
