Martın ikinci ongünlüyündə çaylarda aparılan monitorinqin nəticələri
Ekologiya və Təbii Sərvətlər Nazirliyinin Ətraf Mühit üzrə Milli Monitorinq Departamenti Kür və Araz transsərhəd çaylarında keçirilən, onların qollarının çirklənmə vəziyyətini araşdıran, mart ayının ikinci ongünlüyü üçün nəzərdə tutulan növbəti monitorinqlərin nəticələrini açıqlayıb.
Araşdırmalar Gürcüstan və Ermənistan ərazilərindən birbaşa su obyektlərinə axıdılan məişət tullantıları və sənaye müəssisələrinin çirkab sularının təsiri nəticəsində Kür çayında, onun qollarında biogen maddələrin, həmçinin fenolların normadan dəfələrlə artıq olduğunu göstərib.
Məlum olub ki, suyun tərkibindəki spesifik çirkləndiricilərdən fenollar yol verilən qatılıq həddini Şıxlı-2 məntəqəsində 4.7, Ağstafaçayda 4.4, Ağstafaçay su anbarında isə 3 dəfə keçib.
Fenollar yol verilən qatılıq həddini Araz çayı üzrə Horadizdə 2.5, I Şahsevəndə 2, Bəhramtəpədə isə 3 dəfə keçib.
Kür və Araz çayları üzrə bütün məntəqələrdə mis birləşmələrinin norma daxilində olduğu bildirilir.
Suyun oksigen rejimi bütün məntəqələrdə sanitar norma daxilində dəyişib.
