Əhali artıb. Sosial göstəricilər necə dəyişib?
2017-ci ilin yanvar ayında əhalinin sayı 6,1 min nəfər və ya 0,1 faiz artaraq fevralın 1-nə 9 milyon 816,1 min nəfərə çatıb. Novator.az-ın məlumatına görə, Dövlət Statistika Komitəsi belə hesabat yayıb.
Fevralın 1-nə ölkənin bank və bank olmayan kredit təşkilatlarının kredit portfeli milli valyuta ekvivalentində 16 milyard 705,2 milyon manat təşkil edib. Kredit portfeli 2016-cı il fevral ayının 1-i ilə müqayisədə 21,2 faiz azalıb. Ödəmə vaxtı keçmiş kreditlərin məbləği ümumi kredit portfelinin 9,8 faizinə bərabər olub.
Əhalinin banklardakı əmanətlərinin milli valyuta ekvivalentində məbləği 2017-ci il fevral ayının 1-nə 7 milyard 747,2 milyon manat təşkil edib.
Yanvar-fevral aylarında kənd təsərrüfatının ümumi məhsulu 3,2 faiz, o cümlədən bitkiçilik məhsulları istehsalı 28,8 faiz, heyvandarlıq məhsulları istehsalı 2,8 faiz artıb.
İlin ilk aylarında əvvəlki ilin müvafiq dövrü ilə müqayisədə yük daşınması 4,4 faiz, sərnişin daşınması isə 2,3 faiz artıb.
İnformasiya və rabitə müəssisələrinin hüquqi və fiziki şəxslərə göstərdiyi 257,6 milyon manatlıq xidmətlərin 71,2 faizi əhali sektoruna aid olub. 2016-cı ilin müvafiq dövrü ilə müqayisədə 2017-ci ilin yanvar-fevral aylarında informasiya və rabitə xidmətlərinin dəyəri 2,4 faiz artıb, bu sahədə əldə edilmiş gəlirin 80,4 faizi qeyri-dövlət sektorunun payına düşüb.
2017-ci ilin yanvar-fevral aylarında dövlət büdcəsinə 2 milyard 370,5 milyon manat vəsait daxil olub, büdcədən 2 milyard 191,7 milyon manat vəsait xərclənib, büdcənin icrasında yaranmış 178,8 milyon manatlıq profisit ümumi daxili məhsulun 1,8 faizi səviyyəsində olub.
