Bolqarıstanda mandat bölgüsü açıqlanıb
Bolqarıstanda martın 26-da keçirilmiş növbədənkənar seçkinin ilkin nəticələrinə görə, Avropa İttifaqı tərəfdarlarının GERB Partiyası 240 yerlik parlamentdə 97 nəfərlə təmsil olunacaq.
Novator.az bildirir ki, Sosialist Partiyası parlamentə 81 mandat qazanıb.
“Birləşmiş vətənpərvərlər” bloku 28, Hüquq və Azadlıq Hərəkatı 21, “İradə” bloku 13 deputat yeri əldə edib.
Rəsmi nəticələr martın 30-dək elan olunmalıdır.
Parlamentə düşmək uğrunda 13 partiya, 9 koalisiya, ümumilikdə 4 min 732 namizəd mübarizə aparıb.
Ötən il noyabrın 13-də Rusiya ilə yaxınlaşmaq tərəfdarı olan Sosialist Partiyasından Rumen Radev Bolqarıstan prezidenti seçilib. Bundan sonra GERB Partiyasının təmsilçisi olan baş nazir Boyko Borisov istefa verib və ölkə növbədənkənar seçkiyə gedib. 26 mart seçkisindən sonra bu partiya hakim koalisiya yaratmaq imkanı əldə edib.
