Pensiya fondunda artım var
Yanvar-fevral aylarında Dövlət Sosial Müdafiə Fondunun gəlirləri əvvəlki ilin müvafiq dövrünə nisbətən 15,7 faiz artaraq 561,5 milyon manata yüksəlib. Əmək və Əhalinin Sosial Müdafiəsi Nazirliyi bildirir ki, həmçinin məcburi dövlət sosial sığorta haqları üzrə daxilolmalar ötən ilin müvafiq dövrü ilə müqayisədə 11,6 faiz artıb, 274,5 milyon manata çatıb.
Qeyri-büdcə sektorundan daxilolmalar 180,3 milyon manat təşkil edib və əvvəlki ilin müvafiq dövrünə nisbətən 10,4 faiz artım qeydə alınıb.
Nazirlik bildirir ki, Dövlət Sosial Müdafiə Fonduna daxilolmaların artım səviyyəsinin getdikcə yüksəlməsi mart ayı üzrə pensiyaların maliyyələşdirilməsini tez həyata keçirməyə imkan yaradıb və bu ay üçün tələb olunan 272,9 milyon manat vəsait müəyyən olunan qrafikdən əvvəl yerli orqanların hesablarına köçürülüb.
Artım dinamikasının 2017-ci ilin növbəti aylarında da əmək pensiyalarının maliyyələşdirilməsinin hər ay vaxtında həyata keçirməyə imkan verəcəyi bildirilir.
2017-ci ilin 1 yanvarına olan məlumata əsasən, Azərbaycanda əmək pensiyası alan şəxslərin sayı 1 milyon 315 min 229 nəfərdir. Əmək pensiyalarının orta aylıq məbləği 2016-cı ilin əvvəlinə nisbətən 8,2 faiz artaraq 192,19 manata, o cümlədən yaşa görə əmək pensiyalarının orta aylıq məbləği 213,81 manata çatıb.
