Basqınçılara yardım edən erməni öldü
Ötən ilin yayında Yerevanda polis məntəqəsini ələ keçirən silahlılara ərzaq aparmış Artur Sərkisyan martın 16-da vəfat edib. Novator.az-ın məlumatına görə, Artur Sərkisyan Ermənistan Tibb Mərkəzində müalicə alırdı.
2016-cı il iyulun 17-nə keçən gecə Ermənistan paytaxtında patrul-mühafizə polkuna basqın edən silahlı şəxslər polis əməkdaşlarını girov götürüb, radikal müxalifətçi Jirayr Sefilyanı həbsdən buraxmaq tələbi qoyublar, hökumətin istefası şüarları səsləndiriblər. Basqın zamanı və sonrakı günlərdə 3 polis əməkdaşı həlak olub, bir neçə nəfər yaralanıb. İyulun 31-də dəstə silahı yerə qoyaraq hüquq mühafizə orqanlarına təslim olub.
49 yaşlı Artur Sərkisyan basqın günlərində ərzaq dolu maşını ilə polis postunu dağıdaraq silahlılara yardım aparıb. Cinayətə yardım ittihamı ilə tutulan Artur Sərkisyan dekabr ayında paytaxtı tərk etməmək şərti ilə azadlığa buraxılıb. Qaydaları pozduğu üçün o, 2017-ci ilin fevralında yenidən həbs edilib. Etiraz əlaməti olaraq Artur Sərkisyan aclıq aksiyası keçirib və onun səhhəti pisləşib. Martın 6-da parlamentin bir qrup deputatı onu zaminə götürmüşdü.
