Baş nazirin partiyası seçkini uddu
Niderlandda martın 15-də keçirilmiş parlament seçkisinin ilkin nəticələri açıqlanıb. Novator.az-ın məlumatına görə, baş nazir Mark Rüttenin liderlik etdiyi Azadlıq və Demokratiya Uğrunda Xalq Partiyası ən çox səs yığaraq 150 yerlik parlamentə 33 mandat qazanır.
Radikal millətçiləri birləşdirən Azadlıq Partiyası 20 mandat əldə edir.
Xristian Demokrat Çağırışı Partiyasının və Demokratlar-66 blokunun hərəyə 19 mandata sahib çıxdığı bildirilir.
İlkin nəticələrə görə, Əmək Partiyası 8 mandat götürür.
28 qurumun mübarizə apardığı seçkiyə seçicilərin 81 faizi qatılıb.
Hökuməti qurmaq üçün 76 mandat gərək olduğundan koalisiya yaradılmalıdır.
