Kərgədan buynuzu 50 min avroya! Heyvansevərlər narahatdır
1977-ci ildən dünyada kərgədan buynuzunun satışı və alışı qadağandır. Amma bu qadağa kərgədan buynuzu alverinin qarşısını ala bilmir.
Kərgədanlar bütün dünyada brakonyerlərin hədəfindədir. Onlar kərgədan buynuzlarını qara bazarda satırlar. Bir buynuzun qiyməti isə nə az, nə çox – 50 min avrodur!
Kərgədan buynuzundan xalq təbabətində istifadə olunur. Qədim təbabətdən gələn bu ənənənin əsası Afrikada qoyulub.
2015-ci ildə Zimbabvedə 1300 kərgədan buynuz alverçilərinin qurbanı olub. Nəticədə 2016-cı ilin yayında Zimbabve hökuməti ölkədə 700 kərgədanın buynuzlarının kəsilməsinə göstəriş verib. Bu qərar kərgədanları brakonyerlərin hücumundan qorumaq üçün qəbul edilib.
Buynuz alverçiləri Avropada da fəaldırlar. 2017-ci ilin mart ayının 7-də naməlum şəxslər Fransa paytaxtı Parisin yaxınlığındakı Tuari zooparkına soxularaq Vins ləqəbli 5 yaşlı kərgədanı öldürüb, buynuzlarından birini mişarla kəsərək aparıblar.
Novator.az-ın məlumatına görə, bu hadisə kərgədanların təhlükəsizliyi məsələsini bir daha gündəmə gətirib. Artıq Çexiyanın Dvur-Kralove-nad-Labem zooparkının əməkdaşları bəyan ediblər ki, onlar zooparkdakı kərgədanların buynuzlarını kəsəcəklər. Çexiyalıların fikrincə, Fransadakı hadisə göstərir ki, kərgədanların təhlükəsizliyi üçün buynuzların kəsilməsindən savayı yol qalmayıb.
