Üç ayda xarici borc 737,5 milyon dollar azalıb
Maliyyə Nazirliyi Azərbaycanın 1 yanvar 2017-ci ilə olan xarici dövlət borcunu açıqlayıb. Hesabata görə, xarici dövlət borcu 6 milyard 913,2 milyon ABŞ dollarıdır. Borcun ümumi daxili məhsula olan nisbətinin 20,4 faiz təşkil etdiyi bildirilir.
Hökumətin birbaşa öhdəlikləri və dövlət zəmanəti ilə cəlb edilmiş kreditlər üzrə şərti öhdəliklərin daxil edildiyi borc əsasən beynəlxalq maliyyə institutlarının kredit proqramlarını və infrastruktur layihələrini, həmçinin beynəlxalq maliyyə bazarlarında yerləşdirilmiş qiymətli kağızları əhatə edir.
Novator.az bildirir ki, 1 oktyabr 2016-cı ilə olan hesabata görə, xarici borc 7 milyard 650,7 milyon ABŞ dolları idi. Üç ayda borc 737,5 milyon dollar azalıb.
Ötən ilin əvvəli ilə müqayisədə isə borcda 18,9 milyon dollar artım var. 1 yanvar 2016-cı ilə olan rəsmi hesabata əsasən, xarici dövlət borcu 6 milyard 894,3 milyon ABŞ dolları olub.
