Məşğulluq proqramı: 22 nəfərə yardım edildi
Özünüməşğulluq proqramı aparan Əmək və Əhalinin Sosial Müdafiəsi Nazirliyi Qəbələ və İsmayıllı rayonlarında bir qrup işsiz və işaxtaran şəxsi biznes qurmaq üçün aktivlərlə (mal və materiallarla) təmin edib.
Martın 13-də yayılan rəsmi məlumata görə, Qəbələ rayonunda keçirilən tədbirdə qeyd olunub ki, prezident İlham Əliyevin 7 aprel 2016-cı il sərəncamı əmək resurslarının səmərəli məşğulluğunun təminatına yönələn tədbirlərin miqyasının özünüməşğulluq proqramı vasitəsilə genişlənməsinə imkan verib. Bu məqsədlə prezidentin ehtiyat fondundan 6 milyon manat vəsait ayrılıb. Əmək və Əhalinin Sosial Müdafiəsi Nazirliyi biznes-planları uğurlu hesab edilən işsiz və işaxtaran şəxslərin aktivlərlə təminatını aparır. Müsbət dəyərləndirilən biznes-planların 83,6 faizi kənd təsərrüfatı, 9,4 faizi xidmət, 6,6 faizi istehsal, 0,4 faizi ticarət sahələrini əhatə edir.
Bu işlərin ilkin mərhələsi kimi 25 rayon üzrə aktivlərin təqdim olunması prosesi davam etdirilir. Qəbələ və İsmayıllı rayonları üzrə 29 nəfər iştirakçıdan 22-si aktivlərlə təmin edilib. Onlardan 16 nəfərinə heyvandarlıq, 3 nəfərinə arıçılıq, 1 nəfərinə örtülü tərəvəz (istixana) təsərrüfatı qurmaq, 1 nəfərinə kompüter təmiri, çap və poliqrafiya işləri aparmaq, qalan 1 nəfərinə isə misgərlik fəaliyyəti üçün mal və materiallar təqdim edilib.
Özünüməşğulluq proqramı 1500 nəfərə yaxın işsiz və işaxtaran vətəndaşın ailə təsərrüfatlarının yaradılması yolu ilə onların, eləcə də ailə üzvlərinin özünüməşğulluğunun təmin olunmasını nəzərdə tutur.
