Ekoloji kəşfiyyat aparan robot Marian çökəkliyinə enib
Çin istehsalı olan “Haiyi-7000” sualtı robotu dünya rekordu vuraraq okean dərinliyinin 6,3 kilometrliyinə enə bilib. Aparat Sakit okeanın qərbində yerləşən, dərinliyi 10 kilometrdən çox olan Marian çökəkliyinin bəzi yerlərinə baş vurub.
Novator.az xəbər verir ki, artıq tədqiqatçı robot Çin dövlətinin toxunulmaz mülkiyyəti hesab edilir. Bu aparat 6329 metr dərinliyə qədər tam yüklənmiş halda enmək və uzun müddət ekoloji kəşfiyyat aparmaq gücünə malikdir.
Dünyanın ən çirkli yeri hesab edilən Marian çökəkliyinin Sellencer uçurumunu ötüb keçən “Haiyi-7000” bununla da Amerikaya məxsus “Seaglider-6” sualtı robotunu geridə qoyaraq birinci olub.
“Haiyi-7000” sərbəst şəkildə 5751 metr dərinliyi tam tədqiq edə, qarşısındakı maneələri yerindəcə dəf etməklə daha dərinliyə baş vura bilir. Aparatın fəaliyyəti ətraf mühitə zərər vurmur, ekologiyaya təhlükə yaradacaq heç bir maddə yaymır.
İxtiradan xəbər tutan yerli hərbi qurumlar da “Haiyi-7000” ilə maraqlanmağa başlayıb. Çin Xalq Ordusunun rəhbərliyi bu kəşfin hərbi sahəyə yenilik gətirəcəyinə inanır. Lakin sualtı robotu hazırlayan alimlər deyirlər ki, bu aparatdan istifadə etməzdən öncə okeanın dəqiq xəritəsi yaradılmalı, bütün təhlükəsizlik qaydalarına riayət edilməlidir. Yoxsa aparat hər hansı gəmi və ya sualtı qayıqla toqquşa bilər ki, bu da böyük faciəyə gətirə bilər.
“Haiyi-7000” sualtı elmi-tədqiqat robotu ilk baxışdan kiçik sualtı qayığa bənzəyir. Bu sualtı rekordçu robotun yaddaşında okeanların, dənizlərin relyefi, flora və fauna barədə geniş informasiyalar var. Robotun duzlu və şirin suyun tərkibini öyrənmək, dərinlikdəki canlıları, bitkiləri, mineralları qeydə almaq, təsnifatını vermək imkanı var.
