Çaylarda vəziyyət: monitorinqin nəticəsi açıqlanıb
Ekologiya və Təbii Sərvətlər Nazirliyinin Milli Hidrometeorologiya Departamenti ölkənin çaylarında və transsərhəd çaylarda mövcud vəziyyətlə bağlı məlumat yayıb.
Məlumatda bildirilir ki, Böyük Qafqazın Quba-Xaçmaz bölgəsi çaylarında sululuq ongünlük normanın 140-180, Kiçik Qafqazın çaylarında 160-270, Lənkəran-Astara bölgəsi çaylarında isə 70-170 faizini təşkil edir.
Tranzit çaylara gəlincə, martın 13-də Kür çayının Qıraqkəsəmən məntəqəsində suyun səviyyəsində 4 santimetr azalma müşahidə olunub. Məntəqədə su sərfi ongünlük normanın 83 faizini təşkil edir.
Qanıx çayının Əyriçay məntəqəsində suyun səviyyəsində 2 santimetr artım olub. Bu ərazidəki məntəqədə su sərfi ongünlük normanın 61 faizini təşkil edir.
Martın 13-də Kür çayının aşağı axınında suyun səviyyəsində əsasən azalma müşahidə olunub. Kür çayının Şirvan məntəqəsində 12, Salyanda 10, Araz çayının Novruzlu məntəqəsində 2 santimetr azalma, Surrada 4, Bankədə 2 santimetr artım qeydə alınıb.
Hazırda Surra məntəqəsində suyun səviyyəsi 390, Salyanda 188, Bankədə 179, Araz çayının Novruzlu məntəqəsində isə 88 santimetrdir.
