Texnogen sivilizasiya heyvanların qəniminə çevrilib
Vatikanda konfransa toplaşan dünya mikrobioloqları XXI əsrin sonuna kimi planetdə yaşayan heyvanların yarısının kökünün kəsiləcəyini söyləyiblər.
Novator.az-ın məlumatına görə, konfransda dünyadakı nadir heyvan növlərinin qorunması məsələsi, deqradasiyaya uğrayan faunanın vəziyyəti müzakirə edilib.
Tədbirdə bildirilib ki, vəziyyət çox təhlükəli həddə çatıb, heyvanlar aləmində orta hesabla hər beş növdən birinin yoxa çıxması ehtimalı yaranıb. Alimlər dünyaya təhlükə yaradan bu amilin əsas səbəbini müasir texnogen sivilizasiyada görürlər. Onlar vurğulayırlar ki, bu texnogen sivilizasiya ekoloji sistemin qəniminə çevrilib.
Qeyd olunub ki, müxtəlif qoruqlarda yol verilən qanunsuzluqlar, heyvanların öldürülməsi, balıq ovu, mərcan riflərinin dağıdılması, həmçinin nadir metal hasilatının güclənməsi ekosistemə təhlükəni daha da artırır.
Konfransda əsas məruzəçi kimi çıxış edən Stenford Universitetinin bioloqu Pol Erlix əsrin sonuna yaxın dünya əhalisinin sayının 12 milyard nəfərə çatacağını, bununla da dünya sivilizasiyasının təhlükəli mərhələyə qədəm qoyacağını söyləyib.
Tədbir iştirakçısı iqtisadçı Ser Part isə vurğlayıb ki, Vatikanın belə bir konfransa ev sahibliyi etməsi həm də planetin qorunması məsələlərində din və elm arasında hökm sürən ziddiyyətin aradan qalxdığını göstərir.
