Qəza törədən mikroavtobus qanunsuz fəaliyyət göstərib
Nəqliyyat, Rabitə və Yüksək Texnologiyalar Nazirliyi bildirir ki, martın 9-u Bakı-Sumqayıt yolunda ağır qəza törədən “50 BL 132” dövlət nömrə nişanlı “Ford Tranzit” markalı mikroavtobus sərnişindaşımanı qeyri-qanuni aparıb. Rəsmi məlumata görə, Dövlət Avtomobil Nəqliyyatı Xidməti mikroavtobusa fərqlənmə nişanı verməyib: “Nəqliyyat vasitəsi Bakı-Sumqayıt marşrutu üzrə sərnişindaşıma xidməti göstərmək üçün tələb olunan müvafiq icazə sənədini də almayıb. Şəhərlərarası sərnişindaşıma ilə məşğul olan bütün avtobuslar Bakı Beynəlxalq Avtovağzalından hərəkət etməlidir. Qəza törədən mikroavtobus isə qeyri-qanuni olaraq “Memar Əcəmi” metro stansiyası yaxınlığından sərnişindaşıma xidməti göstərib”.
Sumqayıt şəhər sakini Namiq Hüseynovun idarə etdiyi mikroavtobus martın 9-u səhər saat 8 radələrində Abşeron rayonu ərazisində yolun hərəkət hissəsində dayanmış “ZİL” markalı yük avtomobilinin arxa hissəsinə çırpılıb. Mikroavtobusdakı sərnişinlərdən 5 nəfər həlak olub, 21 nəfər müxtəlif dərəcəli bədən xəsarətləri xəstəxanalar yerləşdirilib.
Daxili İşlər Nazirliyinin Baş İstintaq və Təhqiqat İdarəsinə tabe olan yol-nəqliyyat hadisələrinə dair işlər üzrə istintaq və təhqiqat şöbəsində Cinayət Məcəlləsinin 263.3-cü (yol hərəkəti və nəqliyyat vasitələrinin istismarı qaydalarının pozulması ehtiyatsızlıqdan iki və daha çox şəxsin ölümünə səbəb olduqda) maddəsi ilə cinayət işi başlanıb. Mikroavtobusun sürücüsü Namiq Hüseynov şübhəli şəxs qismində məsuliyyətə cəlb olunub.
Qəzada həlak olanlar Sumqayıt Dövlət Universitetinin tələbələri İbrahim Quliyev, İbrahim Nəsibov, Çinarə Quliyeva, Roza Muradova və Rəşad Canıyevdir.
