Prezident istefaya göndərildi, ölkə qarışdı
Martın 10-da Cənubi Koreyanın Konstitusiya Məhkəməsi prezident Pak Kın Henin istefaya göndərilməsi barədə qərarı təsdiqləyib. 8 hakimin hamısı impiçmentə səs verib.
Novator.az bildirir ki, ötən il dekabrın 9-da parlament prezidentin istefasına səs vermişdi. İmpiçment təşəbbüsünü 234 deputat dəstəkləmiş, 56 nəfər bunun əleyhinə çıxmış, 2 nəfər bitərəf qalmışdı.
Pak Kın Henin istefaya göndərilməsi Cənubi Koreya müxalifətinin təşəbbüsüdür. Prezident dövlət vəzifəsi tutmayan rəfiqəsi Çoy Sun Sili hökumət işlərinə qarışdırmaqda günahlandırılıb. Hazırda həbsdə olan Çoy Sun Silə korrupsiya, vəzifə səlahiyyətlərindən sui-istifadə ittihamları irəli sürülüb.
Senuri Partiyasının üzvü olan Pak Kın He 2012-ci ildə prezident seçilmişdi. O, ölkənin ilk qadın prezidenti idi.
Konstitusiya Məhkəməsinin 10 mart qərarından sonra ölkənin paytaxtı Seulda ara qarışıb. İstefaya göndərilmiş dövlət başçısının tərəfdarları Konstitusiya Məhkəməsinin binasına girməyə cəhd göstəriblər. Polislə toqquşmada 2 nəfərin həlak olduğu bildirilir. Konstitusiya Məhkəməsinin və digər dövlət idarələrinin binalarının mühafizəsinə 20 min polis cəlb olunub.
