Nazarbayevin səlahiyyətləri azaldı
Novator.az-ın məlumatına görə, martın 10-da Qazaxıstan prezidenti Nursultan Nazarbayev ölkə konstitusiyasına dəyişiklikləri imzalayıb. Dəyişikliklər parlamentin aşağı və yuxarı palatalarının martın 6-da keçirdiyi birgə iclasında qəbul olunub. Həmin gün Nursultan Nazarbayev layihəni rəy üçün Konstitusiya Məhkəməsinə göndərib. Martın 9-da Konstitusiya Məhkəməsi dəyişikliklərin ana qanuna uyğun olduğu barədə rəy verib.
Nursultan Nazarbayevin təşəbbüsü ilə hazırlanan layihə yanvarın 26-dan ümumxalq müzakirəsindən keçib. Ana qanunda yeniliklər prezidentin səlahiyyətlərinin bir hissəsini parlamentə və hökumətə ötürür.
Yeniliyə əsasən, prezident yalnız xarici işlər və müdafiə nazirlərini birbaşa təyin edəcək. Qalan hökumət üzvlərinin təyinatı baş nazirin təqdimatı əsasında olacaq.
Baş naziri prezident parlamentin aşağı palatasının (Məclis) razılığı ilə təyin edəcək. Hökumət prezident və parlament qarşısında cavabdeh olacaq, yeni Məclis fəaliyyətə başlayanda istefaya gedəcək. Əvvəlki qaydaya görə, hökumət yeni prezident fəaliyyətə başlayanda istefaya gedirdi.
Dövlət proqramlarının təsdiqlənməsi hökumətin səlahiyyətinə keçib. Prezident hökumətin və baş nazirin belə aktlarını ləğv edə bilməz.
Bölgələrin icra hakimlərinin təyinatı qaydasında da yeniliklər var. Vilayətlərin, Astana və Almatı şəhərlərinin icra hakimləri istisna olmaqla icra hakimlərinin təyinatı qanun əsasında aparılacaq. Əvvəl təyinatları dövlət başçısı həyata keçirirdi.
76 yaşlı Nursultan Nazarbayev 1989-cu ildən Qazaxıstana rəhbərlik edir. 1990-cı ildən prezidentdir.
