Elgiz Qəhrəmanın işi Bakı Ağır Cinayətlər Məhkəməsinə qaytarılıb
NİDA Vətəndaş Hərəkatı İdarə Heyətinin həbsdə olan üzvü Elgiz Qəhrəmanın işi Bakı Ağır Cinayətlər Məhkəməsinə qaytarılıb.
“Azadlıq” radiosu xəbər verir ki, martın 9-da Elgiz Qəhrəmanın şikayəti üzrə Bakı Apellyasiya Məhkəməsində ilkin baxış iclası keçirilib. Gənc fəalın vəkili Fariz Namazlı məhkəməyə qeydlərini təqdim edib. Qeydlər Elgiz Qəhrəmanın işinə birinci instansiya məhkəməsində, yəni Bakı Ağır Cinayətlər Məhkəməsində baxılarkən tərtib olunmuş protokolla bağlıdır. Vəkil bildirib ki, məhkəmədə dindirilən şahidlərə, əsasən də Məhkəmə Ekspertizası Mərkəzinin əməkdaşı Gülşən Hümbətovaya verilmiş suallar, alınan cavablar protokolda yoxdur.
Qanunvericiliyin tələbinə görə, bu cür məsələlərlə bağlı iradlar, protokola yazılı qeydlər olanda iş münasibət bildirilməsi üçün həmin məhkəməyə göndərilir. Fariz Namazlı da Elgiz Qəhrəmanın işinin yenidən Bakı Ağır Cinayətlər Məhkəməsinə qaytarılmasını istəyib.
Dövlət ittihamçısı Rəsul Abbasov buna etiraz etməyib. Nəticədə Bakı Apellyasiya Məhkəməsində Sahibxan Mirzəyevin sədrlik etdiyi hakimlər kollegiyası vəsatəti təmin edib. Bakı Ağır Cinayətlər Məhkəməsi məsələyə baxıb münasibət bildirənə qədər apellyasiya şikayəti üzrə proses təxirə salınıb.
Elgiz Qəhrəman 2016-cı il avqustun 12-də tutulub. 2017-ci il yanvarın 16-da Bakı Ağır Cinayətlər Məhkəməsində hakim Azad Məcidovun sədrliyi ilə keçirilən prosesdə gənc fəal 5 il 6 ay müddətinə azadlıqdan məhrum edilib. O, Cinayət Məcəlləsinin 234.4.3-cü maddəsi (qanunsuz olaraq narkotik vasitələri, psixotrop maddələri və ya onların prekursorlarını hazırlama, istehsal etmə, əldə etmə, saxlama, daşıma, göndərmə və ya satma) ilə təqsirli bilinib.
Elgiz Qəhrəman özü və NİDA Vətəndaş Hərəkatı ittihamları rədd edir, həbsin siyasi xarakterli olduğunu bildirir.
