YAP-ın fraksiyası 2015-ci ildəki vəziyyətə qayıdıb
Mehriban Əliyevanın mandatına xitam veriləndən sonra Yeni Azərbaycan Partiyasının parlament fraksiyasının üzvlərinin sayı yenidən 71 nəfər olub. Novator.az bildirir ki, 2015-ci il noyabrın 1-də keçirilmiş seçkidə YAP-dan 71 nəfər Milli Məclisə düşüb. 2016-cı il iyunun 18-də keçirilmiş təkrar seçkidə daha 1 YAP-çı parlamentə mandat alıb.
YAP-ın sədr müavini Mehriban Əliyeva 14 saylı Xəzər dairəsinin deputatı idi. O, fevralın 21-də birinci vitse-prezident təyin olunub. Mərkəzi Seçki Komissiyası martın 6-da öz ərizəsi əsasında onun deputat mandatına xitam verib.
Seçki Məcəlləsinə görə, MSK 14 saylı dairədə əlavə seçki keçirməlidir. Milli Məclisə seçkilərin təyin edilməsi ölkə prezidentinin səlahiyyətindədir. Qanuna əsasən, əlavə seçki deputat mandatının boş qalmasından sonra bir ay müddətində təyin edilməlidir.
Hazırda daha 11 partiyadan 12 nəfər deputatdır. Vətəndaş Həmrəyliyi Partiyasının 2, Ana Vətən Partiyası, Bütöv Azərbaycan Xalq Cəbhəsi Partiyası, Demokratik İslahatlar Partiyası, Böyük Quruluş Partiyası, Vətəndaş Birliyi Partiyası, Sosial Rifah Partiyası, Sosial Demokrat Partiyası, Vəhdət Partiyası, Demokratik Maarifçilik Partiyası və Milli Dirçəliş Hərəkatı Partiyasının hərəyə 1 mandatı var.
Parlament üzvlərinin 41-i partiyasızdır.
