Rusiyada vəkillərin hüquqları genişləndirilir
Martın 7-də Rusiya Dövlət Duması cinayət icraatında vəkillərə əlavə müstəqillik təminatı verən qanun layihəsini ilk oxunuşda qəbul edib. Novator.az-ın məlumatına görə, ölkə prezidentinin təqdim etdiyi layihə Cinayət-Prosessual Məcəlləyə dəyişiklikləri nəzərdə tutur. Yeniliyə əsasən, vəkilin prosessual öhdəliklərini yerinə yetirməsi cinayət işini aparan vəzifəli şəxsin və ya orqanın qərarından asılı olmayacaq.
Digər dəyişikliklə istintaq aparan orqan prosesdə vəkillərin iştirak qaydasını Vəkillər Palatasının qərarı əsasında təmin etməyə borclu olacaq.
Yeniliyə görə, vəkillərə aid obyektlərdə yalnız məhkəmə qərarı əsasında axtarış aparıla bilər. Məhkəmə qərarında axtarış aparılacaq obyektlərin adları və bunu əsaslandıran məlumatlar göstərilməlidir. Axtarış prosesində vəkilə aid sənədləri, o cümlədən fotoları, videoları götürmək qadağan olunur.
Qanun layihəsində göstərilir ki, vəkil müstəntiq kimi prosesin iştirakçısıdır və sübutlara baxılmasında, şəxslərin dindirilməsində iştirak edə bilər.
