Kür çayının Qıraqkəsəmən, Qanıx çayının Əyriçay məntəqələrində suyun səviyyəsi artıb
Ekologiya və Təbii Sərvətlər Nazirliyinin Milli Hidrometeorologiya Departamentindən Novator.az saytına verilən məlumata görə, hazırda Böyük Qafqazın Quba-Xaçmaz bölgəsi çaylarında sululuq ongünlük normanın 170-210, Kiçik Qafqazın çaylarında 240-260, Lənkəran-Astara bölgəsi çaylarında isə 160-420 faizini təşkil edir.
Tranzit çaylardakı vəziyyətə gəlincə, martın 6-da Kür çayının Qıraqkəsəmən məntəqəsində suyun səviyyəsində 7 santimetr, Qanıx çayının Əyriçay məntəqəsində isə 4 santimetr artım müşahidə olunub.
Kür çayının aşağı axınında suyun səviyyəsində azalma müşahidə olunub. Kürün Surra və Araz çayının Novruzlu məntəqəsində 2, Şirvanda 12, Salyanda 10, Bankədə 1 santimetr azalma var.
