Ürək Mərkəzi açılıb
Martın 6-da Respublika Müalicəvi Diaqnostika Mərkəzinin nəzdində Ürək Mərkəzinin açılışı olub. AZƏRTAC xəbər verir ki, prezident İlham Əliyev və birinci vitse-prezident xanım Mehriban Əliyeva açılışda iştirak ediblər.
Ürək Mərkəzinin yeni binası altımərtəbəlidir. Binanın ümumi sahəsi 13 min kvadratmetrdir. Səhiyyə ocağının inşasına 2015-ci ilin əvvəlində başlanıb və tikinti-quraşdırma işləri bu yaxınlarda başa çatdırılıb.
İntensiv terapiya-reanimasiya şöbəsi mərkəzin birinci mərtəbəsində yerləşir. Buradakı intensiv terapiya çarpayılarının sayı 30-a qədərdir. Mərkəzdə böyüklərlə yanaşı körpələr və uşaqlar üçün də ayrıca reanimasiya otaqları var.
Reanimasiya şöbəsində Azərbaycanda ilk dəfə olaraq “hibrid” əməliyyat bloku yaradılıb. Bu cür əməliyyat zamanı xəstənin daimi müşahidəsi və müayinəsi aparılır.
Ürək Mərkəzində həm böyüklərdə, həm də uşaqlarda ən son texnoloji nailiyyətlərə əsaslanan avadanlıq və cihazların köməyi ilə müayinə və müalicə, eləcə də kardioloji-invaziv və açıq cərrahiyə əməliyyatları həyata keçiriləcək. Yeni səhiyyə ocağında hər bir xəstə barədə ətraflı məlumat əldə etmək mümkün olacaq, müayinə və müalicə dövründəki məlumatlar arxivləşdiriləcək.
Yeni mərkəzdəki çarpayıların sayı 100-ə, həkim otaqlarının sayı isə 35-ə çatır.
