Sərkisyan seçkiyə təhlükəsizlik şüarı ilə gedir
Ermənistanda parlament seçkisinin təşviqat kampaniyası start götürüb. Martın 5-də başlayan kampaniya ayın 31-dək davam edəcək.
Novator.az-ın məlumatına görə, hakim Respublika Partiyası təşviqatı “Təhlükəsizlik və tərəqqi” şüarı ilə aparır. Kampaniyanın ilk günü keçirilən mərasimdə çıxış edən partiya lideri, prezident Serj Sərkisyan Ermənistanın və Dağlıq Qarabağın təhlükəsizliyinin qorunacağını vurğulayıb. O deyib ki, ölkənin və xalqın təhlükəsizliyindən vacib, həyati əhəmiyyətli məsələ yoxdur: “Qalan bütün məsələlərin bərpası mümkündür. Yarımçıq işləri bitirmək, çatışmazlıqları aradan qaldırmaq, səhvləri düzəltmək olar. Amma təhlükəsizlik məsələsində xırda detal yoxdur, bu işdə hər hansı uğursuzluq həlledici ola bilər”.
Aprelin 2-də keçiriləcək seçkiyə 9 siyasi qüvvə qatılıb. 101 mandat uğrunda 1500-dən çox namizəd mübarizə aparır.
Hakim Respublika Partiyasının namizədlərinin siyahısına müdafiə naziri Vigen Sərkisyan başçılıq edir.
Ermənistanın 2015-ci ilin dekabr ayında qəbul edilmiş yeni konstitusiyası ilə ölkə mərhələ-mərhələ parlament respublikası idarə üsuluna keçir. Ana qanuna görə, hökuməti proporsional sistemlə seçilən 101 nəfərlik parlamentdə azı 53 mandatı olan partiya quracaq. 2018-ci ildə Serj Sərkisyanın prezident səlahiyyətləri başa çatandan sonra icra hakimiyyəti və dövlət idarəçiliyi sisteminə ümumi rəhbərliyi hökumət həyata keçirəcək. Yalnız dövlət başçısı funksiyası daşıyan prezidenti isə parlament seçəcək.
