Naxçıvanda yaşıllaşdırma tədbirləri
Yaz mövsümündə Naxçıvan Muxtar Respublikasında 200 hektardan çox ərazidə yaşıllaşdırma tədbirləri aparılacaq. Naxçıvanın Ekologiya və Təbii Sərvətlər Nazirliyindən AZƏRTAC-a bildirilib ki, kənd təsərrüfatına yararsız ərazilərin seçilməsinə və həmin ərazilərdə yaşıllıqların, meyvə bağlarının salınmasına xüsusi diqqət yetiriləcək. Bu məqsədlə Kəngərli rayonunda salınmış püstə bağının 20 hektar genişləndirilməsi və yeni meyvə bağının salınması nəzərdə tutulub.
Bu tədbirlər Naxçıvan-Şahbuz avtomobil yolunun kənarlarında, Naxçıvan Əshabi-Kəhf ziyarətgahı yolunda da davam etdiriləcək.
Ekologiya və Təbii Sərvətlər Nazirliyinin Meşə Tingliyi Müəssisəsinin tingçilik sahələrində də yaz mövsümünə hazırlıq işləri görülür. 2016-cı ilin yazında tingçilik sahəsində 4 min 500-dən artıq üzüm qələmi əkilib. Bu ilin yaz mövsümündə isə 40 mindən çox üzüm qələminin əkilməsi planlaşdırılır. Yeni üzüm qələmlərinin əkilməsi üçün ərazilər hazır vəziyyətə gətirilir. Ərazinin digər sahələrində 40 mindən artıq iydə qələmlərinin əkilməsi də nəzərdə tutulub.
Meşə tingliyi müəssisəsi və meşəsalma ilə məşğul olan digər müəssisələr polietilen torbalarda püstə fidanlarının yetişdirilməsini də həyata keçirir. Ötən il 1500-dən artıq püstə təcrübə məqsədilə əkilib və müsbət nəticə əldə olunub. Bu il də 5 mindən artıq püstə polietilen torbalarda əkiləcək.
