Fransızlar kimi seçəcək?
Fransada prezident seçkisi ilə bağlı yeni sorğunun nəticələri açıqlanıb. Novator.az bildirir ki, “OpinionWay” şirkətinin sorğusuna görə, seçkinin ilk turunda (23 aprel) Milli Cəbhənin lideri Marin Le Pen 27% səslə qalib gələcək.
Respondentlərin 24%-i ilk turda “İrəli” hərəkatının lideri, sabiq iqtisadiyyat naziri Emmanuel Makrona səs verəcəyini bildirib.
Sağ və mərkəzçi partiyaların namizədi, sabiq baş nazir Fransua Fiyon respondentlərin 19%-nin dəstəyini alıb.
Hakim Sosialist Partiyasının namizədi, sabiq təhsil naziri Benua Amonun 15% səsi var.
İkinci tura (7 may) gəlincə, respondentlərin 60%-i Makrona üstünlük verəcəyini bəyan edib. 40% Le Penə tərəfdar olub. İkinci tura Fiyon çıxacağı halda ona 56%, Le Penə 44% dəstək verə bilər.
Martın 3-dən 5-dək keçirilən sorğuya 1671 seçici qatılıb.
