Ermənistanda seçki sorğusu: hakim partiya ikincidir
“Gallup” təşkilatının Ermənistan nümayəndəliyi parlament seçkisi ilə bağlı rəy sorğusu keçirib. Novator.az-ın məlumatına görə, sorğuya qatılanların 26,4%-i Sarukyan blokuna səs verəcəyini bildirib. Bu bloka Çiçəklənən Ermənistan Partiyasının sədri, biznesmen Qaqik Sarukyan rəhbərlik edir.
Sorğunun nəticələrinə əsasən, 22,8% Respublika Partiyasına tərəfdardır. Prezident Serj Sərkisyanın lider olduğu hakim partiyanın namizədlərinin siyahısında müdafiə naziri Vigen Sərkisyan birincidir.
“Yolk” (gediş, çıxış) blokuna respondentlərin 4,3%-i dəstək verir.
Fevralın 23-dən martın 2-dək 1146 vətəndaş arasında keçirilmiş sorğuda Daşnaksütun Partiyası 3,9%, Azad Demokratlar Partiyası 3,4%, Erməni Dirçəlişi Partiyası 2,7%, Konqres-Xalq Partiyası bloku 2,6%, Ohanyan-Raffi-Oskanyan bloku 1,8%, Kommunist Partiyası 1% səs alıb.
Parlament seçkisi aprelin 2-də keçiriləcək. Seçkiqabağı təşviqat martın 31-nə qədər davam edəcək.
2015-ci ilin dekabr ayında qəbul edilmiş yeni konstitusiya ilə ölkə mərhələ-mərhələ parlament respublikası idarə üsuluna keçir. Ana qanuna görə, hökuməti proporsional sistemlə seçilən 101 nəfərlik parlamentdə azı 53 mandatı olan partiya quracaq. 2018-ci ildə Serj Sərkisyanın prezident səlahiyyətləri başa çatandan sonra icra hakimiyyəti və dövlət idarəçiliyi sisteminə ümumi rəhbərliyi hökumət həyata keçirəcək. Yalnız dövlət başçısı funksiyası daşıyan prezidenti isə parlament seçəcək.
