Ekoloji pozuntular: yeni rəsmi hesabat yayılıb
Ekologiya və Təbii Sərvətlər Nazirliyinin Ətraf Mühitin Mühafizəsi Departamenti 16-28 fevral araşdırmalarının nəticələrini açıqlayıb. Rəsmi hesabatda qeyd olunur ki, atmosfer havasının, su və torpaq ehtiyatlarının, yerin təkinin, fauna və floranın mühafizəsi, məişət və istehsalat tullantıları sahəsində yol verilmiş qanun pozuntularına görə 130 akt və protokol tərtib olunub, nöqsanların aradan qaldırılması üçün 24 müddətli məcburi göstəriş verilib.
Ümumilikdə 53 iş üzrə 68100 manat məbləğində inzibati cərimə tətbiq edilib, ətraf mühitə dəymiş ziyana görə 28 iş üzrə 19128,4 manat məbləğində iddia qaldırılıb, ətraf mühitə tullantıların atılmasına və axıdılmasına görə hüquqi və fiziki şəxslərə qarşı 371 iş üzrə 50691,31 manat məbləğində ödəmə tətbiq edilib.
Tədbir görülməsi üçün hüquq mühafizə orqanlarına 22, icra qurumlarına 16, məhkəmələrə isə 7 iş göndərilib.
