Torpağın münbit qatının korlanması və başqa pozuntular aşkarlanıb
Əmlak Məsələləri Dövlət Komitəsi martın 2-si Sabunçu rayonunun Ramana və Maştağa qəsəbələrində monitorinq keçirib. Rəsmi məlumata görə, monitorinqə rayon icra hakimiyyətlərinin, bələdiyyələrin və rayon polis şöbələrinin təmsilçiləri qatılıb. Sabunçu rayonu ərazisində dövlət mülkiyyətində olan 25 hektar kənd təsərrüfatı təyinatlı torpaq sahəsində özbaşına tikinti aparılması halları aşkarlanıb və qarşısı alınıb.
Məlum olub ki, Ramana qəsəbəsində müxtəlif şəxslər kənd təsərrüfatı təyinatlı torpaq sahələrində fərdi yaşayış və müxtəlif məqsədli tikinti işləri aparıb.
Maştağa qəsəbəsində vətəndaşların icarəsinə kənd təsərrüfatı məhsulları istehsalı məqsədi ilə verilmiş torpaqlarda təyinatına zidd olaraq böyük ərazilərin özbaşına hasara alınması və obyektlərin inşasının qarşısı alınıb.
Xəzər rayonunun Zirə və Türkan qəsəbələrində kənd təsərrüfatı təyinatlı torpaqlarda aparılan qanunsuz tikinti işləri dayandırılıb. Bu hallarla kənd təsərrüfatı fəaliyyəti üçün nəzərdə tutulan torpaq sahələrinin istifadəsi ilə bağlı torpaq qanunvericiliyinin tələbləri kobud şəkildə pozulub. Qeydə alınan pozuntu halları ilə əlaqədar tədbirlər görülüb, cərimələr və sanksiyalar barədə inzibati protokollar tərtib edilib və bildirişlər verilib.
7 şəxs barəsində torpağın münbit qatının korlanaraq qeyri-qanuni tikinti işlərinin aparılmasına görə inzibati protokol tərtib edilib. 10 şəxsə torpaq üzərində heç bir hüquqi sənəd olmadan hasara alma halının aradan qaldırılması, 5 şəxsə isə əraziyə tökülmüş tikinti materiallarının yığışdırılması barədə xəbərdarlıqlar edilərək müvafiq bildirişlər verilib.
